Манж Чин улсын төрөөс хошууны ноёдод зүтгэсэн гавъяаг нь харгалзан ван, бэйл, бэйс, гүн хэмээх шаталсан 4 хэргэм олгодог байсан бөгөөд түүнийг Манжийн хуульд төрийн “хэтэрхий дөрвөн хэргэм” гэж нэрлэжээ.
Манжийн хууль ёсоор алтан ургийн бүх гишүүдийг тайж хэмээн нэрлэх бөгөөд өөрөөр хэлбэл, тайж нь ван, бэйл, бэйс, гүн гэсэн “хэтэрхий дөрвөн хэргэм”-ийн дараагийн зэрэг цол болон хувирчээ. Тайж нь дотроо 4 зэрэгт хуваагдаж байв.
1923 онд Ардын Засгийн газраас “Монголын олон засаг ба засаг бус ван гүнгүүдийн эрх хэмжээний дүрэм” батлан гаргаснаар эдгээр цолыг хэрэглэхээ больжээ.
Монголын Үндэсний музейд хадгалагдаж буй уг угсаа залгамжлах бичигт хэд хэдэн бэйс залгамжлах тухай зарлигийг багтаасан бөгөөд “Сүндэвдорж өвчнөөр өнгөрсний хойно түүний хөвгүүн Нямбуудоржийг мөнхүү засаг хошууны бэйс залгамжлав. Үе улиран тасралгүй залгамжилмуй. Сайшаалт Ерөөлтийн дөрөвдүгээр оны тэргүүн сарын шинийн дөрөвнөө” гэжээ.
Discussion about this post