Сүүлийн үед хөдөөнийхөн мөнгө “хийх” тал дээр хотынхныг хол хаяжээ. “Алдарт” койнчин О.Мөнхжингийн “IHC Team” 27 тэрбум төгрөг л босгосон бол Хөвсгөлийн “Бэлтэс мөрөн” баг түүнийг бараг нугалаад 42 тэрбум төгрөг “босгосон”. Тэгвэл Архангайн Эрдэнэмандал сумын “Их орд” баг нэгхэн улирлын дотор 29 тэрбум төгрөг, 150 мянган доллар “хийсэн” байна. Энэ “баг”-ийн толгойлогч нь Цэнхэрмандалын “суут” хүү А.Дэлгэрбаяр агаад “гишүүд” болох Б.Ууганбаяр , Б.Жаргалхүү, О.Ганцоож, Г.Бат-Эрдэнэ бүгд нэг сумых гэнэ. Ганцхан тогооч эмэгтэй Ш.Пүрэвсүрэн нь л хотынх.
… Админууд нь бүгд манай Эрдэнэмандал сумын залуучууд байсан …
Цэнхэрмандалын А.Дэлгэрбаяр нь 2023 оны 5-р сарын 04-нөөс 2023 оны 8-р сарын 9-ний өдрийг хүртэлх хугацаанд хоёр ч байршилд “Рокегггг- 2” аппликейшнийн “Их орд” нэртэй клуб нээж, үргэлжилсэн үйлдлээр “Техас Холдем Покер” гэх мөрийтэй тоглоомыг зохион байгуулсан, уг гэмт хэргийг үйлдэж олсон орлогоо 17 иргэнийн төгрөгийн 23, хоёр иргэний ам.долларын 14, нэг иргэний юанийн дансаар авч нийт 29,1 тэрбум төгрөг, 156 мянган долларыг төвлөрүүлжээ. Үүнээс ашиг болох 571,9 сая төгрөгийг бэлнээр, 230,8 сая төгрөгийг хөдлөх болон үл хөдлөх хөрөнгө худалдан авч хувирган өөрчилж “Lexus RX570” маркийн тээврийн хэрэгслийг 230 сая төгрөгөөр өөрийн хамаарал бүхий этгээд болох Т.Анхбаярын нэр дээр худалдан авсан байна.
Б.Ууганбаяр нь “Би 2023 оны 9-р сарын 03-ны өдөр А.Дэлгэрбаяр гэх нутгийн дүү рүү залгаад “хэд хоног хийчих ажил байна уу” гэхэд “байгаа танд би хаяг зааж өгье та хүрээд ир” гэж хэлсэн. Намайг тэр хаягаар очоод байр руу ороход Б.Жаргалхүү , Г.Бат-Эрдэнэ гэх хоѐр залуу 10 гаруй утас тавьсан “Рокегггг-2” аппликейшн ашиглан цахим мөрийтэй тоглоомыг явуулж байсан” гэжээ.
О.Ганцоож нь “…2023 оны 9-р сарын 04-ний өдөр манай сумын ах А.Дэлгэрбаяр миний дугаар руу залгаад “чамайг ажил хайж байна гэдгийг хүнээс сонссон, покерын клубт админаар ажиллах уу, өдрийн 200 мянгыг өгье” гэсэн. Би тэр шөнөдөө сумаас гарч маргааш нь Улаанбаатар хотод ирээд ажилдаа орсон” гэжээ.
Б.Жаргалхүү нь “2023 оны 9-р сарын 02-ны өдөр манай сумын ах Дэлгэрбар нь 9911-тэй дугаараас залгаж покерын клубт хэд хоног админаар ажиллаад өгөөч, өдрийн 200.000 төгрөгийн цалин өгье гэж хэлсэн. Тэгэхээр нь сургалтын төлбөрөө төлөх гээд за гэсэн” гэжээ.
Анхан шатны шүүхээс толгойлогч А.Дэлгэрбаярт гурван жилийн хорих ял оноож, 492,8 сая төгрөгийн төлбөр тогтоосон. Харин давж заалдах шатны шүүхээс хорих ялыг нь гурван жилийн зорчих эрхийг хязгаарлах ялаар сольсон. Бусад цэнхэрмандалчуудыг 5,5 сая төгрөгөөр торгосон байна.
Discussion about this post