“Өрнөдийн орнуудад инфляци сүүлийн 30-40 жил үзэгдээгүй өндөр түвшинд хүрлээ. Энэ нь олон талаар Өрнөдийн багц хоригууд болон Украинд явуулж буй Оросын цэргийн тусгай ажиллагаатай холбоотой. Үр тариа, бордоо, эрчим хүчний түүхий эдийн нийлүүлэлт тасалдаж улмаар эдгээрийн үнэ ханш дэлхийн зах зээл дээр огцом өслөө. Дэлхийн улс орнуудад ялангуяа хүнс, түлшний жижиглэнгийн үнэ сүүлийн 30-40 жилийн рекордыг эвдэж байна. Зарим газар бүр 50 жил” хэмээн “РБК” сайтын нийтлэлд дурджээ. Олон улсын валютын сан энэ оны 4 сард гаргасан мэдэгдэлдээ “2022 оны сүүлээр хөгжингүй орнуудын инфляци 5.7%, харин хөгжиж буй орнуудад 8.7% болно” гэж таамагласан. Гэтэл зарим оронд энэ үзүүлэлт хэд дахин өндөр болжээ. Инфляци хурдасч буйн хариуд дэлхийн улс орнуудын Төвбанк мөнгө-зээлийн бодлогоо чангатгаж байна. “Үндэсний банкуудын 75% нь 2021 оны дунд үеэс хойш хүүгээ нэмэгдүүлсэн” гэж ОУВС мэдээлэв.
“Инфляцид ядуу орнууд илүү их өртөж зовж шаналж байна. хүнсний бүтээгдэхүүний үнэ 1% өсөхөд дэлхий даяар 10 сая хүн ядуурдаг… Украины зөрчлийн дараа ядуугийн туйлд аж төрдөг хүмүүсийн тоо 95 сая болсон. Инфляци өссөний улмаас 2022 оны 3 сараас хойш хөгжиж буй орнуудын ядуус 71 саяар нэмэгдлээ” хэмээн НҮБ-ын шинжээчид мэдэгджээ.
Гуравдагч орнуудаас гадна дэлхийн хамгийн баян орнуудад ч ноцтой асуудал үүсчээ. Жишээ нь, АНУ-д 6 сард хүнсний бүтээгдэхүүн дунджаар 10,4% өссөн (өнгөрсөн оны мөн үетэй харьцуулахад) бол бензиний үнэ бараг 60 хувь нэмэгдсэн. Ерөнхийдөө жижиглэнгийн үнэ 9,1%-иар нэмэгдсэн, энэ бол сүүлийн 40 жил гаруй үзэгдээгүй рекорд. Өөрөөр хэлбэл, 1981 оны 11 сараас хойш (9,6%).
2022 онд Европт ч гэсэн инфляци дээд амжилт тогтоов. Европын холбооны орнуудад инфляци 6 сард жилийн 9.6% болсон, харин евро бүсэд 8,6%. Харин Литовт хэрэглэгчдийн үнийн өсөлт бүр 20.5%, Эстонид 22% өсчээ.
Орчуулсан М.Цогзолмаа
Өрнөдөд инфляци 40 жилийн рекордыг эвдэв
