“БНАСАУ-ын аугаа удирдагч Ким Ир Сений мэндэлсний 110 жил” үзэсгэлэн болно

БНАСАУ-Монгол Улсын хооронд дипломат харилцаа тогтоосны 74 жилийн ойд зориулсан: “БНАСАУ-ын аугаа удирдагч Ким Ир Сений мэндэлсний 110 жил” үзэсгэлэн:

2022.04.05-10

Нээлтийн ёслол – 2022.04.05- 11.00 цагаас болно.

Монгол Улс, БНАСАУ нь түүх, соёлын өргөн харилцаатай явж ирсэн түүхтэй. БНАСАУ 1948 оны 9 сарын 9-нд байгуулагдсан даруй БНМАУ 1948 оны 10 сарын 15-нд тус улстай дипломат харилцаа тогтоосон билээ. Ийнхүү Монгол улс, БНАСАУ нь тусгаар тогтнолоо харилцан хүлээн зөвшөөрсөн хоёр дахь улсууд болсон юм. 1950-1953 онд болсон Солонгосын дайны хүнд жилүүдэд хоёр орон 1951 онд хоёр талдаа Элчин сайдын яамдаа байгуулж харилцаа, хамтын ажиллагаагаа хөгжүүлж ирсэн. Солонгосын дайны үеэр Монголын ард түмэн Солонгосын ард түмэнд туслах хөдөлгөөн өрнүүлж, их хэмжээний эд материалын болон сэтгэл санааны тусламж дэмжлэг үзүүлж, 200 өнчин хүүхдийг нутагтаа авчирч, асран хүмүүжүүлж, дайны дараах сэргээн босголтын үед ч байгалийн гамшиг тохиолдсон үед ч харилцан тусалж байсныг өнөө хүртэл хоёр орны ард түмэнд үе дамжин дурсагдаж байна.

Ийнхүү 74 жилийн хугацаанд хоёр улс өргөн салбарт хамтран ажиллаж, түүхийн хугацаанд уламжлалт найрсаг харилцаагаа тасралтгүй хөгжүүлж байгаа билээ. Эдүгээ Монгол улс, БНАСАУ хоёр орны хоорондын уламжлалт найрамдал, хамтын ажиллагааны харилцаагаа дэлхий дахинд болон олон улсын байдал, нийгэм эдийн засгийн байгуулалд гарсан өөрчлөлттэй уялдуулан, хоёр орны ард түмний эрх ашигт нийцүүлэн хөгжүүлэх зарчмыг баримтлан амжилттай ажиллаж байна.

Хоёр улсын дипломат харилцааны 74 ой, БНАСАУ-ын удирдагч Ким Ир Сен мэндэлсний 110 жилийн ойг тохиолдуулан зохион байгуулж буй энэхүү үзэсгэлэнд музейн сан хөмрөгт хадгалагдаж буй цуглуулгаас 70 гаруй үзмэр, Малчдын хөгжлийг дэмжих Ж.Самбуу санд хадгалагдаж буй гэрэл зураг, хувь хүмүүст буй эд өлөг нийт 100 гаруй түүхэн үзмэрийг дэлгэсэн тусгай үзэсгэлэнг олон нийтэд 2022.04.05-10-ныг дуустал толилуулна.

Уг үзэсгэлэнг Монголын Үндэсний музей, Монголын малчдын хөгжлийг дэмжих Ж.Самбуугийн Сан, БНАСАУ-аас МУ-д суугаа Элчин сайдын яам, Монголын Жүче судлалын төв хамтран зохион байгуулж байна.