Д.Нямхүүгийн хувийн эзэмшлээс их хэмжээний үнэт чулуу, валют олджээ

ХӨСҮТ-ийн захирал асан Д.Нямхүүг өнгөрсөн шөнө АТГ-аас баривчилсан бөгөөд хэд хэдэн үндэслэлээр шалгаж байгаа аж.

Тодруулбал, цар тахлын үеийн хөрөнгийг үр ашиггүй зүйлд зарцуулсан, мөн хувьдаа завшсан байж болзошгүй хэрэгт буруутган шалгаж байгаа юм.

Эх сурвалжийн мэдээлж буйгаар түүний хамаарал бүхий байгууламжид нэгжлэг хийхэд их хэмжээний үнэт чулуу, валют олдсон төдийгүй төрийн өмчийг хувьдаа завшсан байж болзошгүй бичиг баримт олдсон байна.

Түүнийг Д.Нямхүүг 2021 оны нэгдүгээр сард “Өргөө” амаржих газарт төрсөн эхийг орой нь ХӨСҮТ рүү шилжүүлэхдээ алдаа гаргасан гэх үндэслэлээр ажлаас нь чөлөөлсөн ч 2021 оны наймдугаар сард шүүхээс Д.Нямхүүг ХӨСҮТ-ийн даргаар буцаан томилох шийдвэр гаргаж байсан юм. Гэсэн ч тэрээр эргэж ажилдаа ороогүй байгаа бөгөөд одоогоор ХӨСҮТ-ийн ерөнхий захирлаар Л.Билэгсайхан ажиллаж байна.