Ах нь тэрбум мод тарихаар болж, дүү нь мод устгачихав уу?

Ах нь сургадаг дүү нь сонсдог гэдэг манайд ах нь мод тарьж, дүү нь мод шатаасан гэх ноцтой, эмгэнэлтэй явдал гарлаа.

Монгол Улсын Ерөнхийлөгч У.Хүрэлсүх НҮБ-ын Ерөнхий ассамблейн чуулганы индэр дээрээс “Дэлхий нийтийн өмнө тулгараад буй уур амьсгалын өөрчлөлтийн асуудлыг шийдвэрлэхэд хувь нэмэр оруулахын тулд 2030 он гэхэд Монгол Улсад тэрбумаар тоологдох хэмжээний мод тарих хөдөлгөөн өрнүүлж эхлээд байна” гэж хэлсэн. Энэ хүрээнд мод тарих ажил өрнөж, хаа сайгүй Монгол Улсын Ерөнхийлөгчийн санаачилсан тэрбум мод тарих ажлын хүрээнд гэсэн гал цогтой үгс хаа сайгүй цуурайтдаг байлаа. Гэвч гай газраас, гахай модон дотроос гэж. Төрийн тэргүүн ахынхаа санаачилсан сайхан үйл хэрэгт төрсөн дүү нь сэв суулгана гэж хэн санах билээ. 

Энэ сарын 08-нд Халх Нөмрөгийн дархан цаазат газар түймэрт өртөж, 80 хувь нь шатаж, өчнөөн ан амьтан амиа алдлаа. Хятадын хилд тулж ирэн их гал түймэрт өртөн амиа алдсан зээрийн сүргийн сүргийн бичлэг дэлхий даяар тарж, Япон, Солонгосын хэвлэлүүд мэдээлж байна. Монголчуудаа очихоор нохой мэт хөөдөг дархан цаазат газарт Мобикомын захирал Ясухиро Очи дураараа дургисан нь хэний буруу вэ гэлцэж, албан бусаар УИХ-ын гишүүн У.Отгонбаярыг буруутнаар “тодруулж”, нэхэл хатуутай хариуцлага шаардаж байгаа. Халх Нөмрөгийн дархан цаазат газартр очоогүй гэдгээ У.Отгонбаяр гишүүн хэвлэлийнхэнд тайлбарласан…

УИХ-ын гишүүн Ухнаагийн Отгонбаяр төрийн тэргүүний төрсөн дүү. Гурван ах, эгчтэй ч айлын бага хүү. Ах эгч нар нь насаар хол зөрүүтэй учир аав ээжийгээ ирэхэд нь гэр орныхоо ажлыг хийчихдэг, гурилаа элдэж, хоолоо хийж, ус, түлээгээ базаачихдаг хүүхэд байжээ. “Хүрэлээ ах чөлөөгөөр ирэх их гоё. Цэвэрхэн хувцсаа өмсөөд талбай орж зургаа авахуулна. Паркад ганц, хоёр тоглоом дээр сууна. Нэг төгрөгийн үнэтэй дугуй хуушуур эргүүлнэ” гэсэн тайлбартай нэгэн зураг Хүүхдийн баяраар чамгүй анхаарал татсан. 1988 оны зураг дээр цэргийн сургуулийн сонсогч 20 настай У.Хүрэлсүх отгон дүүдээ малгайгаа өмсүүлж, мөрөөр нь тэврэн зогсоно.