Наадмын өдрүүдэд ХГБХХЕГ болон харьяа дүүргийн хэлтсүүдийн нийт 260 орчим албан хаагч Төв цэнгэлдэх хүрээлэн, Үндэсний сурын талбай, Хүй долоон худагт хүүхдийн эрхийг хангах, хамгаалах чиг үүргээ хэрэгжүүлж, үйлчилгээ үзүүлэн ажиллалаа.
Хурдан морины зургаан насны ангилалд 1100 гаруй морь уралдав. Энэ үеэр нийт 42 хүүхэд мориноосоо унасан. Гэхдээ хүүхэд бэртэж, гэмтээгүй байна.
Энэ жилийн баяр наадмын хурдан морины уралдаанд хяналт хийх явцад ажиглагдсан зүйл нь хүүхдийн эрх, аюулгүй байдлыг хангахын тулд манай байгууллагаас Монголын морин спорт уяачдын холбоонд өгсөн зөвлөмж, саналуудыг анхаарч, өмнө жилийн алдаа дутагдлыг засаж залруулах асуудалд ахиц гарсан байна. Нэг зорилгын төлөө хамтран ойлголцож ажилласан тус холбооны хамт олон болон ерөнхийлөгч Д.Дагвадорж танд талархлаа.
Цаашид уралдаанч хүүхэд бүрд стандартад нийцсэн хамгаалах хувцсыг өмсөж хэвшүүлэх, энэ асуудалд уяач, морины эзэд бүрийг анхаардаг болоход илүү зүтгэлтэй ажлуудыг хэрэгжүүлнэ гэдэгт итгэлтэй байна.
Мөн ХГБХХЕГ-аас Үндэсний их баяр наадмын Өсвөрийн сур харваа, Өсвөрийн бөхийн барилдаанд амжилт гаргасан нийт 14 хүүхдийг Олон Улсын хүүхдийн “Найрамдал” цогцолборын энэ жилийн 9-р ээлжид, хурдан морины 6 насны ангилалд морьдоо айрагдуулсан 30 хүүхдийг ирэх жилийн 3-р ээлжид амрах эрхийн бичгээр урамшууллаа.
Эдгээр өдрүүдэд албан үүрэгтээ үнэнч, нягт нямбай, чин сэтгэлээсээ ажилласан албан хаагчид, хүүхдийн төлөө сэтгэл зүтгэлээ зориулсан хүн бүрд баярлалаа. Та бүхэндээ сайхан бүхнийг хүсэн ерөөе.
Discussion about this post