“ХААН” банкны зээлийн мэргэжилтэн цагаан сарын шинэ мөнгө сольж өгнө хэмээн 45 САЯЫГ шилжүүлж аваад бооцоот тоглоомд алджээ 

“Хаан” банк нь сар шинийн баярын өмнө ажилтнуудад давуу байдал бий болгон шинэ мөнгө сольж өгдөг гэнэ. Ажилтнууд нь авсан шинэ мөнгөө цаашаа танил тал болон байнгийн харилцагчиддаа өгдөг аж. Өнгөрсөн оны сар шинийн өмнө тус банкны Зээлийн судалгаа шинжилгээний харъяа Зээлийн дэмжих албаны мэргэжилтэн А.Б нь танил болох С.Б-г яаруулж байгаад 45 сая төгрөг шилжүүлж аваад бооцоот тоглоомд алджээ. Хохирогч нь “… 2018 оноос эхлэн таньдаг болсон бөгөөд 2024 оны цагаан сарын өмнө түүнээр 15,000,000 төгрөгийг шинэ мөнгө болгон солиулж авч байсан. 2025 оны 2-р сарын 19-ний өдөр тэрээр миний фейсбүүк чат болон утас руу залгаад “манай банк шинэ мөнгөний захиалга авч байна, өнөөдөр сүүлийн өдөр, захиалгаа явуулаарай” гэхээр нь “маргааш больё” гэхэд намайг шамдуулаад байсан. Ингээд би  данс руу нь 45,000,000 төгрөгийг  “Баатараа” гэсэн утгатай шилжүүлсэн. Тавдахад шинэ өгнө гэсэн ч “өнөөдөр худлаа боллоо, нэгдэхэд шинэ мөнгө ирнэ” гэсэн. Гэсэн ч нэгдэхэд утсаа авахгүй, чатад хариу бичихгүй болохоор нь эхнэр Д бас ах руу нь залгасан. Ах нь “дүү бооцоот тоглоомд мөнгийг чинь алдсан байна, ээж тэрийг нь сонсоод бие муудаад эмнэлэгт ирсэн, бид эмнэлэгт байна” гэсэн. Тэр өдрийнхөө орой над руу  “уучлаарай ахаа ээжийн бие муудаад байна мөнгийг нь эргүүлээд төлнө” гэсэн чат бичсэн ч өгөөгүй тул цагдаад хандсан …” гэжээ. Цахим бооцоот тоглоомын 1xbet-ийн агентийн мэдүүлснээр шүүгдэгч нь 69 сая төгрөгөөр дансаа цэнэглүүлээд тоглосон аж.  Шүүх хурал болоход шүүгдэгч нь хохирлыг бүрэн барагдуулсан тул хорих ял авалгүйгээр 12 сая төгрөгөөр торгуулжээ.