Сүхбаатар дүүргийн ерөнхий прокурор асан Э.Амарбат, түүний анд бизнесмэн Б.Мандахбаяр нарын шүүх хурал гуравдахь өдрөө үргэлжилж байна. Энэ шүүх хурлын үер 2022 онд шуугиан дагуулаад яваандаа замхарсан Баянзүрх дүүргийн Иргэний хэргийн анхан шатны шүүхийн ерөнхий шүүгч С.Амардэлгэр, өмгөөлөгч Л.Энхбат нар нь бүлэглэн “Баянхотгор” компанид давуу байдал үүсгэхээр хэрэг хариуцсан шүүгчид 10 мянган доллар буюу 32,1 сая төгрөгийн хахууль өгсөн хэрэг сөхөгдөн яригджээ. Хэрэгт авагдсан баримтаар өдгөө шүүгдэж байгаа ерөнхий прокурор асан Э.Амарбатын их сургуулийн “анд” Б.Мандахбаяр нь тухайн үед “Баянхотгор” компанийг иргэний хариуцагчаар татаж шүүхдэлцэж байсан. Булаацалдаж байсан зүйл нь Говь-Сүмбэр аймгийн Баянжаргалан суманд орших Мөнхтийн цагаан дөрвөлжин хэмээх долоон сая тоннын нөөцтэй гэх литийн орд байсан. Энэ хэрэг шат дамжин явсаар буцаагдаж Баянзүрх дүүргийн иргэний хэргийн анхан шатны шүүхэд ирж шүүгч Т.Болормаад хувиарлагджээ. Тэр үед С.Амардэлгэр нь ажлаа өгсөн байсан. 2022 оны 9-р сарын 8-ны 16 цагийн үед тэрээр машинтайгаа ирж шүүгч эмэгтэйг гэрээс нь аваад Гацууртын Их ам хэмээх уул руу давхижээ. Замдаа “чам дээр нэг хэрэг хувиарлагдсан, тэр хэргээс болж олон асуудал гарсан тул болгоомжтой байгаарай” хэмээн сануулаад “одоо нэг хүнтэй уулзана, чи бараг таних байх, өмгөөлөгч Л.Энхбат ч дээ” гэжээ. Ууланд очиход үнэхээр зүс таних өмгөөлөгч ирсэн. Өмгөөлөгч “тан дээр дээд шатны шүүхээс хүчингүй болгосон хэрэг ирсэн, үүнийг шийдэх хэрэгтэй байна, та хуулийн гарц гаргалгаагаа бод, тэр үед би ямар хэрэг болоод байгааг хэлж өгье” гэжээ. Хариуд нь шүүгч эмэгтэй хэргээ уншаагүй байгаагаа хэлжээ. Тэгэхэд өмгөөлөгч “наад хэрэг чинь Салхитын мөнгөний ордноос ч том гээд гадуур шуугиад байгаа, гэхдээ та айх хэрэггүй” гэж “зоригжуулжээ”. Тэд шүүгчид “та эхний удаад хэрэглэж бай” гээд дугтуйтай юм өгөөд “энэ эхнийх шүү, дараа нь нэмж өгнө, ингэж нэмж өгнө шүү” гээд 10 хуруугаа гозолзуулжээ. Шүүгч эмэгтэй дугтуйтайг буцааж өгөх гэхэд аваагүй гэнэ. Гэрийх нь хажууд буулгахдаа “солиулахдаа болгоомжтой байгаарай” гэхэд нь доллар өгсөнийг нь мэджээ. Гэхдээ шүүгч эмэгтэй нэг алдаа гаргасан нь дугтуйг гэртээ авч ороод хонуулсан буюу маргааш өглөө нь Шүүхийн ерөнхий зөвлөлд мэдэгдсэн байна. Үүний улмаас тэр дор нь мэдэгдээгүй, нөхөрдөө хэлсэн зэрэг эргэлзээтэй нөхцөл байдлыг тодруулах шаардлага гарчээ. Нийслэлийн прокуророос хэргийг хахууль өгсөн гэх зүйлчлэлээр шүүхэд шилжүүлсэн ч шүүгдэгч нарыг өмгөөлүүлэх эрхээр хангах, гомдол гаргах мөн хэргийн дээрхи эргэлзээтэй нөхцөл байдал, нотлох баримтыг шинжлэн судлах шаардлагатай хэмээн прокурор руу буцаагаад хэрэг замхрах тал руугаа орсон билээ.
Discussion about this post