УИХ-ын Төрийн байгуулалтын байнгын хороо, Өргөдлийн байнгын хорооны хамтарсан хуралдаанаар нийтийн ашиг сонирхлыг хөндсөн асуудлаар гаргасан иргэдийн өргөдлийг хэлэлцлээ. Уг өргөдөл нь УИХ-ын тухай хуулийн 41 дүгээр зүйлийн 41.9 дэх хэсэгт “Хэрэв гишүүн бүрэн эрх дуусгавар болсноос хойш ажил эрхлээгүй бол 12 сарын хугацаанд гишүүний үндсэн цалинтай тэнцэх хэмжээний тэтгэмж, бага цалинтай ажилд орсон бол цалингийн зөрүүтэй тэнцэх хэмжээний тэтгэмж, …олгоно” гэснийг хүчингүй болгох асуудлаар хуулийн төсөл санаачлах өргөдөл юм.
Хэлэлцүүлгийн үеэр Ц.Даваасүрэн гишүүн “Энэ асуудлаар ажлын хэсэг байгуулаад явах ёстой байх. УИХ-ын гишүүд төрийн түшээ хүний байр суурьтай байдаг баймаар байна. Сүүлийн үед гудамжны популизм хэтэрхий хийдэг боллоо. Одоо бүр цалингүй ажиллая гэсэн юм ярьж эхэллээ. УИХ бол баян хүний жаргаж цэнгэдэг газар биш. УИХ бол төр улсаа авч явах гэж байгаа хүмүүсийн цугладаг газар. Тийм баян юм бол өргөдлөө өгөөд зайл.
Өнөөдрийн хэлэлцэж байгаа асуудал бол төрийн нууцтай холбоотой. Ийм асуудал гарч байсан юм. Х.Жекейгийн үед гарсан юм. Төрийн нууцтай ажиллаж байсан хүмүүс өөр улсын иргэн болох, гадаад руу гарах, гадны компанийн зөвлөх болох, төрийн нууцыг худалдах зүйл явагдсан учраас нэг жилийн хугацаанд нууцыг хадгалах зорилгоор зориуд УИХ-ын гишүүнээр ажиллаж байсан хүнийг цалинжуулж төрийн өмнө үүрэг хүлээлгэдэг юм. Үүнийг тайлбарлахгүйгээр шууд популизм хийх хэрэггүй. Нэр хүндээ өсгөхийн төлөө төрийн тогтолцоогоо сулруулж болохгүй” гэлээ.
Discussion about this post