Ж.Оджаргал: Бид үндэсний баялгийн санг дэмжиж, яаж бодит ажил хэрэг болгох вэ гэдэг тал дээр хэлэлцээр хийхэд бэлэн

MCS группийн захирлуудын зөвлөлийн дарга Ж.Оджаргалаас цаг үеийн асуудлаар тодруулга авлаа. Тэрээр “Стратегийн орд гэж юуг хэлэх вэ гэдэг анхнаасаа ойлгомжтой байх ёстой. Ямар ч хөрөнгө оруулагч ард түмэн, орон нутагтаа өгөөжийн 50-аас дээш хувийг өгөхийн төлөө хичээнэ. Үүний төлөө ажиллахад бэлэн. Гол нь хөрөнгө оруулалт хийхээс  өмнө хэлэлцэн тохирсон, зүйлээ л биелүүлдэг байх ёстой.

Стратегийн орд гэх нь буруу гэж боддог. Хуучин томъёоллоор үндэсний нийт бүтээгдэхүүний таван хувиас дээш борлуулалттай бол стратегийн орд газар гэж нэрлэсэн байдаг. Гэвч одоо эдийн засаг томорч байна. Стратегийн бүтээгдэхүүн гэж байх нь зөв болов уу. Тэр нь уран ч юм уу  гарцаагүй үндэсний аюулгүй байдалтай холбоотой бүтээгдэхүүнээр нь заах хэрэгтэй. Үгүй бол стратегийн орд гэхээр нүүрс, алт бүгд стратегийн орд байх боломжтой гэхээр хөрөнгө оруулагчид ордын нөөцийг олсон ч стратегийн байвал авна гэх айдастай болно. Ийм байж болохгүй.

-Бизнест төрийн дарамт шахалт хэр байна? Өнгөрсөн хугацаанд Ухаа худаг”-аа авъя гэх хөдөлгөөн хүртэл өрнөлөө шүү дээ?

-Бид үндэсний баялгийн санг дэмжиж, яаж бодит ажил хэрэг болгох вэ гэдэг тал дээр хэлэлцээр хийхэд бэлэн. Мэдээж хуулийн хүрээнд зөвхөн нэг ААН, нэг орд дээр биш бүгд адилхан шийдэл олохын төлөө ширээний ард суухад бэлэн. Хэлэлцээр эхэлсэн явж байгаа. Бодит шийдэл олъё гэж байгаа. Шийдэл гэдэг  нь уул уурхайгаас орсон өгөөж ард түмний амьдралд бодитоор мэдрэгддэг, улсын төсөвт ахиухан татвар төлдөг байх ёстой. 

Хандивын асуудалд зохион байгуулалттай гүтгэлэг явлаа. Хуулиараа нэр дэвшигчдэд тэдэн төгрөг өгнө гээд заасан байгаа. Тэр дагуу бид хуулийн хүрээнд өгч байгаа. Нэг ААН 30 сая төгрөг гээд гурван ААН өгвөл 90 сая төгрөг болно. Групп компанийн хувьд гурван компани нийлээд  нэг гишүүнд 90 сая төгрөг өгч болно. Энэ хүрээнд л бид ил тодоор өгч байгаа.

Бид нам үл харгалзан хулгай хийхгүй, ард түмнийхээ төлөө, бизнесийн эрх зүйн зөв орчин бүрдүүлнэ нийгэмд зөв ажилна гэж бодсон нэр дэвшигчдэд өгч байсан. Хэрэв ААН хандив өгөх нь буруу гэж үзэж байгаа бол хуулиа өөрчлөөд өгч болохгүй гэвэл бидэнд бүр л амар болно. Үүн дээр гүтгэлгийн чанартай зүйл л явсан.

Бид хандив өгсөн гишүүдээсээ юм гуйж үзээгүй, гуйх ч үгүй. Уулзаад холбоотой байх юм огт байхгүй. Бид бизнесийн эрх зүйн орчинг эрүүл байлгаад өгөөсэй, татварын эрх зүйн орчин зөв байгаасай, хөрөнгө оруулалт зөв татах эрүүл улс төрч их байгаасай гэж л хандив өгч байгаа.