Амандаа алтан биш алмазан халбага зууж төрсөн гэмээр охин бол Annie Moon. Түүний нэр Өмнөд Солонгосын алдарт брэнд Samsung-тай зайлшгүй холбогдоно. Samsung-ийн үүсгэн байгуулагч түүний элэнц өвөө бөгөөд эмээ нь Shinsegae группын захирал. Самсунгийн 4-р үеийн өв залгамжлагч, Солонгосын дээдсийн хүрээний чэбол охин, удамд залгамжлагдсан нэр төр, их мөнгөтэй охин. Түүнийг алгаа тосон, найр тавин угтах дээдсийн хүрээлэл бий. Явах зам нь хэдийн тодорхой, өвлөсөн эрх мэдэл, нэр хүндийг дагаад л бизнесийн ертөнцөд хөл тавихад долоон үеэрээ алзахгүй. Гэвч Annie Moon энэ бүхнээс татгалзлаа. Хүмүүсийн хэвшмэл ойлголтыг эвдэн, өөрийн хүсэл мөрөөдлөө даган урлагийг сонгож, дуучны замналаар явахаар. Тэр саяхан дебютээ хийн зураг авахуулав.
Сонирхуулахад 2002 онд төрсөн, Колумбын их сургуулийг дүүргэсэн энэ бүсгүйг GD-ы найз охин гэж хэсэг яригдсан билээ. Тэр ярилцлага өгөхдөө “Би 7 настай байхдаа 2NE1 болон Big Bang хамтлагийн “Lollipop” дууны клипийг үзсэн. Энэ үнэхээр цочирдмоор байсан. Миний хувьд шинэ ертөнц нээгдсэн. Би тэдний хийж байгаа зүйлийг заавал хийхийг хүсч байна гэсэн шийдвэр гаргасан гэж бодож байна. Нэг өдөр би ээжээсээ “Намайг дуучин болно гэж юу гэж бодож байна?” гэж санамсаргүй асуусан. Тэгээд тэр зүгээр л инээгээд “Энэ боломжгүй” гэж хэлсэн болохоор би “Тийм зүйл болохгүй” гэж бодсон. Хэдэн жилийн дараа би үүнд нухацтай хандахыг хичээж, “Ээж ээ, би дуучин болохыг үнэхээр хүсч байна” гэж хэлэхэд тэр “Энэ үнэн үү, үнэхээр дуучин болохыг хүслээ гэж үү?” гэж гайхсанаа шууд “ҮГҮЙ” гэж хэлсэн. Тэгэхэд би гэр бүлийнхээ эсэргүүцлээс болж, амьдралдаа анх удаа “зүрх шимшрэх”-ийг мэдэрсэн” гэжээ.
Discussion about this post